26- هتوحشني

رمضان انتا هتوحشني اوي :(

هتوحشني نفسي وانا بسابقها عشان اختم القرآن قبل ادان مغرب آخر يوم

هيوحشني ارهاقي وانا بعمل مواعين الفطار عشان ببقى تقلت في الأكل

هتوحشني مجاهدة نفسي عشان اصلي التراويح والتهجد كاملين

هيوحشني برنامج خواطر

هتوحشني لمتنا عالفطا والسحور بنكهة خناقات سياسية مريرة

هيوحشني كسلي انا وماما عن النزول في اي مكان و أي حتة بعد الفطار

هيوحشني اليوم وربع الي قعدتهم مع تيتا وجدو

هتوحشني أصوات الجوامع وقت صلاة التهجد

هتوحشني الايام الاولانية بتاعت رمضان الي كلها بهجة وجمال وأكل شديد

احنا مدناش رمضان حقه السنة دي .. اتلهينا في السياسة والنيلة وفوق كدا التلزيق والرطوبة عشان كدا كمان رمضان قرر انه هيسرق مننا يوم ويبقى بدل 30 يوم .. 29 يوم بس ..

لكن الحمد لله وانا على عكس كتير من الناس ليلة العيد دي ببقى زعلانة ان رمضان خلص اكتر مما بكون فرحانة ان العيد جه ..

ومع ذلك عيدكم بيضحك .. واللهم بلغنا رمضان القادم سالمين غير فاقدين ولا مفقودين والشعب المصري في سلام آمنين :)

25- عودة من جديد :))

بسم الله الرحمن الرحيم .. ^^

منقطعة عن الحوليات بقالي فترة انا وبعتذر عن ده .. والسبب إني قررت العودة :)

العودة لايه بقى ؟ العودة لهواية قديمة عندي مركونة بقالها حوالي سنة .. هواية الرسم :))

آينعم كنت برسم في الكتب ايام المذاكرة لكن ده مش رسم يعني :D

بصراحة .. الرسامات الي اعرفهم استفزوني استفزاز ايجابي جدا بشكرهم عليه :))

هاجر هشام الباشا و ملك محمد ... رسوماتهم تحفففة ايه ده ^_^

جرى ايه بقى ؟ مانا بعرف ارسم انا كمان ؟ بعرف اه بس مكسله ...  وفي مرة بعد الفجر قررت اني هرسمني .. طلعت صورة وبدأت أقلدها .. ومطلعتش شبهي باتقفلت :( وادورت عالسرير لـ ستيكر ستروبري شورت كيك الملزوق عالحيطة وبدأت أقلدها لحد ما رسمتها وطلعت شبهها الحمد لله :))

والحوار قلب معايا جد وقررت اني أرجع ارسم تاني .. زي ما الحوليات خلتني أرجع اكتب تاني ..

بغض النظر عن مدى قيمة وجودة وفائدة الي برسمه أو الي بكتبه .. لكن لحد كبير بيحسسني اني قادرة اعمل حاجة :)

ودي الصورة الي رسمتها اهي ^^

 

وده لينك صفحتي الي ان شاء الله انشر الرسومات فيها :)) https://www.facebook.com/DodoArtCollection

لينك صفحة الرسامة هاجر هشام :)) https://www.facebook.com/Hagar.Hesham.Art.Work

لينك صفحة الرسامة ملك محمد :)) https://www.facebook.com/MalakMohamedDrawings

24- العيد ده فرصتنا بقى :))

بسم الله الرحمن الرحيم .

.اعزائي الشباب الي أجازاتهم ادمرت تحياتي وبعد ..

بصوا بقى العيد ده فرصتنا يا رجالة .. شاكب راكب لازم نعيد صح ان شاء الله !! xD

وعشان ده يحصل لازم يكون على مستويين .. الاول روحاني والتاني مستوى الفرفشة ..على المستوى الروحاني .. الحمد لله الذي بلغنا رمضان وبلغنا العشر الأواخر من رمضان واللهم بلغنا ليلة القدر :))احنا في العشرة الي فيهم عتق من النار ..ويا رب آنا واهلي وكل الي بيقروا التدوينة دي نكون من المعتوقين من النار ان شاء الله ..الي بيبسط في العيد هو الي بيجتهد في رمضان .. صلى التراويح والقيام وادعي كتييير وحاول تختم القرآن ..جرى ايه بقى ست الشيخة الي بتتكلم دي ؟ ولا شيخة ولا بتاع .. الي بتكلم حضراتكوا دي واحدة بتنام الساعة 6 الصبح تصحى الساعة 3 .. بتفرج عالتليفزيون وبقرأ وبقعد عالنت .. بيس ! وبصلي وبصوم وبقرا قرآن وكل الي فوق ده :)) بيس برضو :Dأهم حاجة النية يا رفاق .. نية انك عايز تجتهد في آخر أيامك في رمضان وربنا يوفقنا كلنا :Dنيجي بقى للفرفشة ودي محتاجلك فيها نية سليمة برضو .. وهي انك ناوي تتبسط وناوي تعيد فعلا ان شاء الله :)قدامنا 10 ايام اهو قبل العيد .. اعتقد نقدر نتنيل فيها * احم احم .. سوري * نخطط عايزين نعمل ايه في العيد ..بقالك قد ايه مروقتش اوضتك وحسيت انها جميلة كدا وتشرح القلب وبتبرق من النضافة ؟بقالك كتير صح ؟ حالا جدول تنضيف اوضتي .. مش معقول انتا تتلمع في العيد وتسيبها كدا .. دي أوضنا وسرارينا وشبابيكنا شايلة كتير بقالها صيف شتا :)بقالك قد ايه محسيتيش انك امورة ومزة ؟! كتيييير .. حالا خطة " أريد أن أكون أمورة في العيد " شعرك الي منفضاله .. سنانك .. وشك الي مليان حبوب وتحت عينيكي الاسود من كتر السهر .. ضوافرك .. طقم العيد وطرحة العيد وتسريحة العيد !!!! حالا بالا ما نجهز للحاجات دي .. وطالما انتي بتجتهدي وبتحاولي ربنا هيوفقك وتبقي امورة في العيد .. انما طول ماحنا منفضين طول ما هنفضل غوريلات :Pونساعد ماما شوية في تنضيف البيت  .. منسبهمش في الصيام والحر والعطش بينفضوا السجاجيد واحنا بننفض .. ليهم :)) سواء لو ولد أو بنت ده ميعفيش حد من المسئولية تجاه ماما :)))بقالكوا قد ايه مخرجتوش مع صحابكوا أو أهاليكوا ؟ ها ؟ ههههههههههههه .. نيهاهاهاهاهاهاهاهاها .. البت دي بتهري في ايه مش فاهم والله العظيم .. هو فيه حد شاف خروجات في أي حتة من اي نوع في الأجازة النحس دي يا أختي ؟ معلش بقى يا شباااب .. كل ثوووورة وانتوا طيبيييين وعلى الحكام الظالمين منكدين ^_^

قدامك 10 ايام اهو افتح الموضوع قدامهم وأكيد ان شاء الله هتلاقي ناس بتشجعك وتقولك دايسين معاك في الحوار ده احنا نموت ونتفسح .. وان شاء الله ميكنش فيه مظاهرات ولا قلق في العيد :)))وختاما ...لطلبة الثانوية العامة الي رايحين اولى جامعة .. ابسطوا يا رفاق .. المرة دي مش زي كل سنة هيبقى عندك دروس بعد العيد .. فكر في كدا و ايا كان مجموعك .. ابسط  :)) والى اصدقائي الي في سني .. 3 ايام العيد ممكن نعتبرهم ان شاء الله استراحة محارب .. استراحة من أجازة مضروبة بنكهة السياسة واستراحة قبل بداية ماراثون الدروس والمذا كرة .. 3 ايام ممكن نعمل فيهم حاجات معملنهاش بقالنا كتير ..نزور ناس مبنشفهاش غير في العيد ..نقرا كتاب أو رواية مخليلنها بقالنا سنة مش راضيين نقراها .. تسمع مزيكا وتحس انك سعيد .. تاكل كحك العيد وتشرب نسكافيه وانت مستطعم .. تتغدى رينجا او سوشي حسب انتمائكتسمع آذان الفجر وتشكر ربنا بامتنان وتصلي وفي دماغك انك الحمد لله صمت رمضان خلاص ومش مضطر تحس بالعطش بعد دقيقتين من الادان :)) وكل سنة وانتوا طيبين :)

23- نوستالجيا .. عن مجلة ماجد

النهاردة الاربعاء يوم صدور العدد الاسبوعي من مجلة ماجد ..

ذكريات كتييييرة اوي .. من ايام ما كنت في مصر لسه اولى ابتدائي كدا وماما كانت بتجبهالي .. بعدين روحنا السعودية سنتين تانية وتالتة ابتدائي وكانت برضو ماما بتجيبهالنا كل أسبوع وانا وميدو اخويا كنا بنقراها ..

كان بالنسبة لي قمة الحلاوة الصفحتين بتوع كراملة و مدرسة البنات .. وكنت بقرأ البابين بتوع بستان المعرفة و أحباب الله .. وببقى منبهرة بقى بالمعلومات الي فيها وكدا .. ومكنتش بسيب حاجة في المجلة الا وكنت بقراها حتى لو مش بحبها اوي .. فتكون عندي مجلدااااااات من مجلة ماجد طول السنتين دول .. واحنا راجعين مصر مكنتش حابة اسيبهم خالص .. لكن سبتهم :'(

ولما رجعنا مصر كنا بنشتريها برضو لحد ما وصلت 5 ابتدائي كدا بيتهيألي .. وبطلنا بعدها .. كبرنا بقى ...

أما النهاردة فماما قررت تشتريها .. عشان خاطر يوسف بالذات ( اخويا 10 سنين ) عشان هو صايم من اول رمضان ومرهق وكدا ..

المهم ان يوسف مقارنة بينا انا ومحمود (12 سنة) فهو فكس معاه حوار المجلة ده خالص !

اول ما ماما جابتها انا مسكتها قريتها ومحمود كمان .. وقاعد بيحل الكلمات المتقاطعة فيها دلوقتي :D

يوسف ممسكهاش 10 دقايق على بعض اصلا .. :)

مش قصدي الوم يوسف .. الوم العالم الي هو السبب في ان جيل كامل ينشأ وعادة القراءة مش متاصلة فيه ..

قريت ماجد تاني وبصراحة .. حسيت ان فيه حاجات مش مستحملاها برضو من فرط طفولتها يعني .. لكن في المجمل استمتعت ولاقيت كراملة اتحجبت -_- :))

نوستالجيا :))))

22- عن البناتيت و جمالهم ^^

البنات البنات ألطف الكائنااااات ^^

لا بجد احنا ازاي كدا ؟ :D

ازاي فيه حاجات بسيطة بتبسطنا كدا ؟ ازاي حلوين كدا ؟

مش ببالغ حقيقي لكن دي الحالة الي انا حساها ..

البنوتة على اختلاف سنها .. من 6 سنين ليمكن 40 سنة .. 

كلمة بحبك .. كلمة محتاجلك .. اي كلمة من حد بتحبه .. بالذات الحد الي هو الي شاغل نص تفكيرها ده xD

حاجات كتيرة اوي بتبسطنا .. ومش مكلفة .. لكنهم لا يعلمون :))

دفتر مذكرات شيك او عليه رسمة او Quote حلوة :))

انسييل او سلسلة عليها لعبة حلوة ومبتكرة .. ممكن متتعداش حدود الـ10 جنيه ! لكن مش هتقلعها ابدا لمجرد انها منك ولمجرد انك أخيرا فهمت هي بتحب ايه :))

Cover للموبايل بتاعها .. ان شالله حتى لونه فسفوري ! احنا مجنونين بيهم :))

 Lib gloss لونه رقيق و هادي .. :)

و شوكولا او بيتزا ..

او كلمة تعالي اخرجك امشيكي بالعربية شوية واجيبلك آيس كريم :D

علبة الوان محترمة لو هي غاوية فن ♥

سي دي عليها اغنية بتعشقها .. ممكن الاغنية تبقى عالموبايل واللابتوب عندها لكن عالسي دي الي انت شاريهولها بتختلف ♥

الفوانيس .. بكل أحجامها بقى :)

حاجات body-care ومش شرط من الغالية اوي يعني :D

وردة ...... 3>

باختصار .. مفيش اسهل من إنك تبسط بنت .. لو ابوها اخوها عمها ابن عمها بنت خالتها مامتها اختها صاحبتها الانتيم .. او المز بتاعها او خطيبها او جوزها او حبيبها او تعرفها بأي شكل .. احنا بنبسط باقل حاجة .. انتوا بس خدوا النية وسيبوها على الله وهنقبل بأي حاجة منكم .. ولو قلم رصاص يا سيدي !! :) 

21- نوستالجيا

عن رائحة شوكولا تخترق أنفاسك بعبقها ولم تتذوقها بعد ..

عن تصورك لديو غنائي يجمع بين فيروز و حليم .. ♥

عن مكالمة تلقيتها من شاب مرموق المكانة في اسرتكم يهنئك بمجموعك الضخم في إحدى سنوات الدراسة الهامة :)

عن عقلك الذي كان أشبه بحديقة زهر لم ينبت بها الصبار بعد .. أيام الطفولة :D

عن حنينك للماضي بكل تفاصيله و رفايعه .. نوستالجيا ♥

♥

♥

♥

♥

20- من جهاد إلى هالة .. إلى أخريات من بنات المنصورة

"منصورة يا مصر مش بجميلة العسكر .. احن الي روحنا بدري مش اكتر"

ده جزء من قصيدة لتميم البرغوتي كان قالها فترة حكم المجلس العسكري المشئومة ..

وسبب اني افتكرتها ان فيها كلمة منصورة .. والمنصورة مدينتي .. والمنصورة اسم مؤنث و إناثها في وقت الشدة رجالة ..

بنات المنصورة هما احسن بنات في الدنيا .. علم و أدب و أخلاق وكل حاجة ..

جهاد موسى .. الي استشهدت داخل جامعة المنصورة دهسا بعربية دكتورة لحد دلوقتي القانون معاقبهاش .. الناس قربت تنسى لحد ما طلعت جهاد جديدة .. هالة ابو شعيشع ..

هالة ابو شعيشع .. كانت داخلة 3 ثانوي .. مدرسة المنصورة الثانوية الجديدة بنات .. وكانت في فصل متفوقات تانية ثانوي .. وليا صحاب يعرفوها .. ساكنة فين ؟ في شارع عبد السلام عارف .. يعني جارتي وبين بيتها وبيتي بضعة امثار وبابا يعرف باباها .. يعني ايه كمان ؟ يعني لو كان جه شهر سبتمبر كنا هنبقى انا وهي زمايل في مدرسة واحدة ..

وتوفت .. ماتت .. ومحدش عارف بالظبط مين قتلها وازاي قتلها وليه قتلها .. الله يرحمها .. ماتت وهي بتدافع عن قضية مؤمنة بيها بغض النظر عن موقفنا من القضية دي ..

جهاد وهالة لو كانوا عايشين مين يعرف جايز كانوا يقدروا ينهضوا بالبلد ويحققولها حاجة كبيرة .. 

الاتنين ضحايا اهمال وفساد وسفالة وقلة أدب نظام رغم كل الشهدا دول لسه مسقطش ..

عاشت المنصورة برجالتها .. رجالتها البنات ورجالتها الرجالة ...

في الصورة :- جهاد موسى هي الي من غير ماسك .. هالة شعيشع لابسة ماسك ونضارة ..

في الجنة يا شهيدات ^^ ويا رب نلحقكم ♥

19- عزيزي الشعب .. كفاية خناقات !

النهاردة كنا عازمين تيتا وجدو وخالو واسرته عالفطار عندنا وللاسف نسينا نفكرهم بالكلمة المعهودة والرسمية في كل عزومات مصر السنة دي وهي :-

" يا ريت بلاش كلام في السياسة "

وخلص الفطار الحمد لله .. وعالساعة 9 كدا بدا الكلام في السياسة قصدي الخناق في السياسة .. لمدة ساعة كاملة .. طبعا الجو الاسري الجميل والمتناغم كان سائد ومكنش فيه بغضاء ولاحاجة :D لكن النقاش كان صوته عالي اوي اوي وكله بيتكلم .. وبما اني من الصغيرين لما فتحت بؤي بابا سكتني -_- ماشي ما علينا ..

سر الخناق .. ان العيلة كووووولها مع السيسي ومع 30 يونيو .. وبابا الوحيد الي مع مرسي .. وبابا يتناقش مع بلد ما شاء الله ..

وانا كنت متخذة موقف المتفرج .. اخرته ايه الخناق بصوت عالي ؟! كل واحد مقتنع برأيه ومش ناوي اصلا يغيره وفاكر انه يقدر يقنع تاني ! والموضوع مش بس في البيوت .. ده في الاشغال وبين الموظفين وفي الشوارع وده اكيد صورة مصغرة للي بيحصل في المظاهرات الضخمة وفي التوك شوز والي انا بطلت اتابعها بصراحة ..

تتعدد المواقف والآراء .. ظاهرة ايجابية وكل يوم بتتطور وتتهذب وتتشذب وبتتخذ المسار الصح وده من مكتسبات الثورة على فكرة .. الخوف الوحيد على بلدنا وعلى مصيرها وعلى ان العسكر يعملوها ويركبوا تاني !

وافتكرت .. ايام حكم المجلس العسكري لما كنت بتنرفز اوي واتناقش بحدة عشان اثبت ان حكم العسكر باطل والمظاهرة الوحيدة الي نزلتها هتفت يسقط حكم العسكر .. دلوقتي في معظم الاحيان مبيتسمعليش صوت ولا رأي .. لان مكاني مش وصت معركة الصوت العالي دي ! وااعتقد ده احسن .. كانت خناقاتهم فايدتها ايه يعني ؟ :D

وختاما .. أذكر موقف لرجل احسبه من أنقى و اصفى و أروع و اجدع و أجمل رجال هذا الوطن .. د.عـمـرو خـالـد الي اعترض برضو على العك الي بيحصل ده وقرر يسيب السياسة ويسيب رئاسة الحزب الي أسسه ويتفرغ للعمل الدعوي و الاجتماعي ..

يا سلام يا دكتور .. ربنا يكتر من امثالك ^__^

18- ندى تتحدث إلى نفسها

لو الكلام الي عن التنسيق ده صح :- طب 97.7% طب اسنان 96% هندسة 90% يبقى جه بصراحة اسمه اسستعباط وترسيخ لمفهوم ان تعليمنا متخلف بكل معنى الكلمة .. واحد فاشل مفتحش كتاب الا اخر شهر وجاب 90% تسمحوله يدخل هندسة ازاي ؟! هيبقى مهندس عامل ازاي دي ؟! وازاي تساووه بواحد جايب99% اطحن من المذاكرة طول السنة .. ؟ رحمتك يا رب -_-

انا امبارح كنت خارجة مع بابا وماما بجيب يونيفورم ثانوي :D وكنت راجعة مبسوطة التنين لاني اولا اشتريت حاجات حلوة ثانيا اتبسطت لما شفت الشعب المصري لسه في الشوارع ومبسوط وبيجيب حاجة حلوة وبيشتري هدوم العيد و هدوم المدارس .. كنا بالليل الساعة 12 كدا وكان الشارع كله منور وسهران .. حسيت ان السكة الجديدة دي زي خان الخليلي كدا مع الفارق طبعا لاني مزرتش خان يعني :))

كون انك بنت تخينة او مليانة شوية فلازم تتعاملي مع الموضوع ده صح وبأحد طريقتين .. واحد : انك تتقبلي طبيعتك انك مليانة وتلبسي هدوم ملائمة ليكي .. مش معنى كدا تتدهولي في حاجات واسعة جدا .. لا .. حاجات مناسبة ليكي وتداري الديفوهات يعني وتحبي طبيعتك كمان .. حاجة حلوة جدا انك تكوني بطوطة !! xD عندكوا انا مثلا .. بطة رسمي في الدريل الجديد بتاع ثانوي ده لكن مداري الديفوهات فحاسة ان شكلي حلو فيه :)) اما الطريقة التانية لو كارهة نفسك بقى خالص مص صح اطلاقا تهري وتنكتي في نفسك وتبصي عالي جسمهم حلو وتغيري وتنفسني فتعيطي فتكتابي ! خدي قرار جدي بإن هتتعبي على نفسك تعب جدي بنظام غذاي صح وبرياضة وهتخسي وش ان شاء الله لو عندك النية :D هتسألوني عن حالي .. اقولكم اني بحاول اتأقلم مع طبيعتي الدبدوبة لحد ما اخلص 3 ثانوي وبعد 3 ثانوي .. عهد جديد بإذن الله :-)

عزيزي و عزيزتي .. متعتمدوش في تكوين صداقاتكم واختيار اصحابكم على فيسبوك وتويتر .. هتتعرف على ناس آه وهتتبادل ثقافات وخبرات وممكن تخرجوا خروجات حلوة وتتفسحوا سوا .. لكن في الأول موقف جد البلاستيك بيبدا يظهر في الموضوع .. صاحبك الي بجد والي تعتمد عليه في وقت الزنقة هو صاحبك الي عاشرته .. معاشرة حقيقية على أرض الواقع مش اونلاين عشان المواقف الجد مبتحصلش اونلاين :) كون صداقاتك في الواقع الاصلي .. بلاش تكون فاشل في الصداقات زي حالاتي -.-

ان شاء الله وبدون مقاطعة قررت مكذبش تاني ابدا .. توبة يا عم عن الكذب ده :/ وبصراحة , انا كدبت كتير قبل كدا .. كدبت عشان اهرب من موقف بايخ .. كدبت عشان أجمل من شكلي أو من شكل حد بحبه .. ضفت بعض المبالغات البسيطة على بعض الحاجات الي بقولها .. كدبت عشان اهرب من حد عايز يخليني اعمل حاجة مش عايزة اعملها .. ايه لازمته الكدب ده ؟! ليه أخسر نفسي وأخسر ثقة ربنا فيا وتكريمه ليا كإنسانة ؟!! ليه اتكتب كذابة عند ربنا وتتكشف كذباتي قدام كل الخلق يوم القيامة ؟! الدنيا مش مستاهلة تخسر احترامك لنفسك عشان أي حاجة او اي حد ممكن تكدب عشانه او بسببه .. وختاما شكرا لت مصطفى حسني :))

17- نظرا لإني ..

نظرا لإني .

نازلة حالا

وانا مش مستعدة

اساسا للنزول

ومش مستعدة أكتر

تسقط حبة من عقد حولياتي اللؤلؤي

ولا مستعدة يعدي يوم من غير كتابة

بسبب عدم استعدادي للنزول

فقررت أكتب

حاجة بسيطة و مختصرة جدا

انا نازلة اشتري يونيفورم ثانوي

ولنا حديث آخر :*

16- من دفعة 2016 لـ دفعة 2013 .. مبروك !!

النهاردة طلعت نتيجة الثانوية العامة ..

اليوم ده على مر السنين ببقى مبسوطة فيه ومهتمة اعرف النتيجة و الدرجات وكدا

ببقى مبسوووطة جدا لما بسمع عن الولاد و البنات الدحاحين وماماهتهم وابهاتهم مبسوطين بيهم اوي عشان مجامعيهم كبيرة ♥

وببقى بدعيلهم على طول .. اما الفاشلين فمعنديش ذرة تعاطف معاهم بصراحة لان ده طريقهم وهما الي اختاروه :)

وببقى كمان مهتمة اعرف مين الاوائل وببسط اما اشوف صورهم وكلامهم في الجرايد والبرامج وكدا بقى :D

وخلوني اقول حاجة .. آي نعم نظامنا التعليمي فاشل و غبي .. ولكن هل ده معناه انكم تسفهوا من المتفوقين فيه وتتفهوا من مجهودهم ؟

طبعا لأ .. اوائل الثانوية العامة وغيرهم من المتفوقين في التعليم دول اذكيا .. واذكيا جدا كمان ومش كلهم مكن حفظ وبس .. دول شباب عندهم قدرات جامدة جدا فعلا وقدروا يتاقلموا وسط الفشل ده وينجحوا والتقصير من الدولة المبجلة الي مش قادرة تستغل قدراتهم صح !!

وإلى طلاب الثانوية العامة .. هنيئا لكم المجموع ولو حتى 60% .. ياما ناس مدخلتش ثانوي عام من اصله ودلوقتي من برنسات المجتمع :)) ابسطوا ابسطوا ابسطوا .. وحبايبي الفائقين و الفائقات انتوا ابسطوا بزيادة بقى :)

المجموع الجامد ده ثمرة تعبكم و جهدكم وقفركم طول سنييييين :))

الناس دي بجد محدش فرحان قدهم دلوقتي .. :))

من دفعة 2016 - ان شاء الله لو في العمر بقية يعني - إلى دفعة 2013 :-

احنا دلوقتي بنبتدي المشوار الي انتو خلصتوه ..

بندور على مدرسين ناخد عندهم المواد الي طلعت عينيكوا ..

احنا دلوقتي لسه داخلين على عنق الزجاجة الي انتوا خلصتوا منه .. ماشية معاك يا عم , قاعد تفكر بقى هتدخل كلية ايه وهتلبس ايه ومقضيها :D

وانتوا بالتأكيد دفعة مميزة .. عشان ذاكرتوا واحنا في اصعب فترة في مصر وعاصرتوا مبارك وطنطاوي والمرسي و السيسي .. كلهم xD

لكن احنا برضو مميزين .. دفعة 2016 .. الي هي دفعتي ان شاء الله .. الي هي لسه داخلة على اولى ثانوي هتبقى دفعة مبروكة لان امتحاناتهم غالبا وحب آخر الاحصاءات الفلكية هتكون في شهر رمضان المعظم :))

احساسي .. اني كمان تلات سنين بالظبط ان شاء الله هبقى فاتحة التدوينة وبقراها وببتسم ابتسامه من قلبي اوي .. 

اكون بقراها وانا ان شاء الله ربنا مديني المجموع الجامد طحن .. وبقول ياااااه ..

و مكملين :)

15- فكرتي عن الجواز

بسم الله الرحمن الرحيم ..

احم احم موضوعنا النهاردة شائك يا اخواني :D #شيخ_سلفي_ستايل

يا سيدي سنة الحياة .. 

والقانون الي ربنا حطهولنا عشان التكاثر ..

و أعظم حاجة في الكون ..

والبنت ملهاش في الآخر غير بيتها و جوزها ولازم تسمع كلام جوزها ..

بيس اوي لحد كدا متفقين على فكرة ... المشكلة في ايه بقى ؟

المشكلة لخصتها الفنانة الجامدة بسمة في جملة في الحلقة السادسة من مسلسل الداعية

" انا مش هرتبط بواحد يعملي فيها متحضر بعدين اكتشف لما نتجوز فجاة انه بقى سي السيد "

ايوا هي دي الحقيقة .. الرجالة في الحوار ده 3 انواع .. 1- واحد طبيعته سي السيد ومبيحاولش يبين كدا لخطيبته وبيفضل على طبيعته الغبية قدامها عااادي 2- واحد طبيعته سي السيد لكن بيخبيها عنها في الاول عشان متتصدمش فيه والجوازة متبوظش 3- نوع محترم وده في طريقة للانقراض للاسف :))

يقولك , الست لازم تطيع جوزها في كل حاجة وتدلعه وتنفذ اوامره ويستدل على ذلك بالاحاديث والايات الي بنحترمها وبنحفظها كلنا .. لكن بتقف معاهم عند كدا .. عند دور الست .. طيب بالنسبة لدور الراجل ؟ دور سعادة الباشا ؟ دور سي السيد الآمر الناهي ؟ دور اللطخ - آيم سوري في اللفظ يعني - ؟؟؟

للأسف الرجالة في مجتمعنا غالبيتهم كدا .. والي تلاقيه منهم راجل فعلا وبيحترم مراته وبيقدرها بيبقى شاذ وسطهم ويدعولوا ربنا يصبره ويكون معاه وان ليه الجنة عشان الي بيعملوا لمراته وولاده ... وهو استثناء يؤكد القاعدة .

الزوجة المصرية من أوفى الزوجات في العالم وبتفني نفسها عشان بيتها وجوزها وولادها والرجالة عارفة كدا لكن بدل ما تحترم ده بتستغله او بتستهيفه ..

وبناء عليه .. كان قراري أنا ندى مراد وانا داخلة على سن 15 سنة وفي كامل قواي العقلية .. 

انا رافضة الوضع ده .. مش حابة الجواز بالشكل ده ولا حابه أؤسس بيتي في المستقبل على النمط ده .. انه اكون الزوجة المضحية وهو الزوج الباشا .. مش هتجوز الي اشوفه ميسور ماديا واخلاقه عالية وخلاص .. مش هسارع بإني اقبل عريس مش مقتنعة بيه عشان ارضي اهلي او عشان خاييفة من العنوسة ...

والجميل .. ان في خطتي المستقبليه شايلة منها الجواز .. ومتصورة نفسي آنسة جميلة غير متزوجة ومنفضة لأي حد يقولها نص كلمة .. !! مش هقتل طموحي و اكبت احلامي عشان اتجوز من راجل مش مقتنعة بيه .. :))

وختاما .. الجواز أقوى و أعظم رباط موجود في الارض .. والجواز من شخص يقدر و يحترم ويفهم يعني ايه زوجة هو احلى حاجة في الدنيا بالنسبة لأي بنت ♥♥ انا امنيتي اتجوز .. لكن من حد يحبني ويفهمني ويحترمني ويعتبر نجاحي في شغلي نجاح ليه .. نتشارك حياتنا سوا من غير ما يفرض عليا ده .. ميحاولش يلغي كياني ويكره استقلاليتي ..

ادعولي وادعوا لبنات مصر الكبار منهم والصغيرين والي لسه متولدوش .. ادعولنا نلاقي رجالة على خلق و دين و مبدأ و شرف و رجولة نتجوزهم .. ساعتها احنا الي هنخليهم سي السيد .. بمزاجنا :)

14- عن كتب د.مصطفى محمود

بسم الله :)

بما إن موضوع الحوليات الأسبوع ده عن الروحانيات .. قررت أفتتحها بتدوينة عن كتب د.مصطفى محمود ..

للي ميعرفوش هو مفكر و باحث اسلامي كبير ليه كتب كتيرة جدا في مواضيع العقيدة و الايمان والفلسفة ..الخ

الحقيقة انا بدأت اقرأ كتب ليه من فترة قصيرة جدا .. قريت حوار مع صديقي الملحد وحاليا بقرا رحلتي من الشك إلى الإيمان ..

حضرتك وانت بتفتح كتاب لـ د.مصطفى محمود ممكن تكون فاكر زيي انه خلاص بمجرد ما تقرأ الكتاب وتستوعبه هتكون كامل الإيمان ولاقيت أجوبة شافية لكل الاسئلة الي بتنطط في دماغك عن ربنا و عن القرآن و عن الخلق .. لكن ده مش صح ..

د.مصطفى محمود ممكن يفتحلنا ابواب وسكك لكن عشان نؤمن ايمان كامل وعميق لازم نمشي السكك للآخر بإننا نبحث احنا بنفسنا ونتفكر .. 

عشان محدش يستحق لذة الايمان الكامل بربنا الا الي تعب و فكر و بحث ونظر واعاد النظر ..

والتفكر حلو وممتع للي عايز وللي غاوي .. والكلمة الدارجة حاليا في موضوع الايمان ده :- محدش مؤمن بنسبة 100%

وانا بصراحة اتعارض مع كدا .. اكيد فيه ناس مؤمنة بنسبة 100% وطموحي في الحياة اني اكون منهم على آخر عمري كدا ان شاء الله :))

لو قلبك جامد وعندك أرضية صلبة من الايمان و اليقين والمخ الشغال .. اقرا كتب د.مصطفى محمود .. فكر متركنش دماغك .. لما تفكر وتقرأ وتسال عن ربنا وعن دينك لو فطرتك سليمة هتوصل وايمانك هيزيد بالتدريج .. احسن مما تبقى طوبة خايفة تقرا او تفكر او تفتح آفاق جديدة في دماغك عشان متتلخبطش !

وختاما .. الإيمان و الإطمئنان لربنا لذة لا يعرفها إلا من ذاقها :-)

13- جوابات .. الجزء الأول

  - 1 -

الزمان : 1/9/2009

المكان : سنتر استاذ محمد هشام - كيمياء ثانوية عامة

" دي ثانوية عامة يا منة .. السنة الي مصيرك هيتحدد فيها .. صيدلة صيدلة ولن ارضى بديلا عن الصيدلة "

دي كانت الجملة الي بتزن في دماغي من ساعة ما بدأت السنة دي .. بنية انها سنة للعلم فقط ولإنها السنة الي عايزة أتوج فيها مجهود سنين في التعليم المصري .. ولكن إرادة ربنا ان يكون فيه عقبة .. عقبة تقيلة وبلاء تقيل على أي بنت انها تستحمله او تقاومه .. حاجة كدا ممكن تؤدي لتشويش دماغك بشكل رهيب وغير مفهوم فتعطل المراكب السايرة وتهرب الأفكار و الطموحات .. وتهرب مني صيدلة .. !!

 أحمد حسين .. معرفة سطحية جدا من أولى ثانوي .. كان بياخد عند مستر محمد هشام لكن محصلتش اننا نكون في مجموعة واحدة وعل لقائي الوحيد بيه قبل السنة دي كان في مسابقة أوائل الطلبة بين مدرستي ومدرسته .. وكنا واقفين فيها قصاد بعض السنة الي فاتت .. والسنة دي .. كنا في مجموعة واحدة .. وفي نفس المكان لمدة ساعة كل اتنين و أربعاء       

جواب .. في التاني في التالت .. ايه الهبل ده بقى .. مش شاكة في حد ومش عارفة ده حد مستلطف نفسه ولا ايه .. وفي يوم رجعت البيت لاقيت الشنطة فيها وردة .. وانا بضعف قدام الورد :/

انا كنت بخاف من الحاجات دي .. مسكت الجوابات كلها وقطعتها .. أما الوردة فجففتها في الكراسة بتاعتي .. 

شلت الموضوع من دماغي وفكني بقى .. بعد درس يوم الاربع كنت بلم حاجتي ومروحة مع مريم .. السنتر فيه حوالي 20 وكله واقف بيتكلم مع بعضه عادي .. قرب علينا .. أحمد حسين .. هو دحيح وليه في جو الشعر والخطابة .. ميبانش عليه يعني انه واحد من الدحيحة المملين بتوع ثانوية عامة ..ولا نظام الشنب الخفيف ونضارة كعب كباية وتشيرز صيف شتا .. كان شكله كول يعني وخدوم وحبوب .. والمعروف عنه انه كان ولد مؤدب ..

- منة .. مريم .. ازيكوا ؟

وفي صوت واحد : الحمد لله .. ؟؟

- المستر اداكوا مذكرة المعادلات ولا لسه ؟

- لسه ..

- طب اتفضلوا .. اتفضلي يا مريم .. اتفضلي يا منة

- امممم .. طيب ليه تعبت نفسك هو قال انه هيديهالنا الحصة الجاية ..

اضطرب شوية كدا وقال :- لا ماهو .. اداني واحدة وقالي صورها واديها لزمايلك .. اييه .. يلا سلام بقى عندي درس عربي ..

ومشى ..مكنتش فاهمة ايه الحوار بالظبط يعني .. لكن مجاش في بالي اي فكرة من أي نوع وقلت عادي يعني .. حطيت المذكرة في الشنطة .. وإلى بيتنا ..

لما روحت البيت فتحت المذكرة وقلبت فيها .. نطلي من حيث لا ادري ولا احتسب جواب .. مش معقولة !! احمد حسين هو الي بيبعت الحاجات دي ؟ 
" إلى منة .. ربما تكون كلماتي التي أكتبها الآن وكلماتي التي كتبتها سابقا كفيلة بأن تتهاوى من نظرك صورة الشاب المحترم الدحيح التي يرسمها لي الناس .. ولكن لمشاعري عليّ حق .. أحبك و حسبي الـ4 حروف الآن .. "

بتحبني ؟ تحب ايه يا عم بس خلينا في الي احنا فيه والنبي .. الجواب ده غير .. لاني عارفة مين الي كاتبه .. يا رب 

وأخدت قراري بالتجاهل التام و غيرت المجموعة عشان ميبقاش فيه أي احتكاك من اي نوع خالص .. خدت معاد بعد معاد مجموعتي القديمة بـ 3 ساعات .. خلصت انا ومريم وطلعنا برا السنتر ..

لاقيته واقف كأنه مستنينا .. ويا ريته ما استنى ...

12- غلطاتك .. مسئولياتك

لما تعمل غلطة شنيعة أو تكون كبيرة بالنسبة لك .. هتحس بالندم وبوخزة الضمير لو الموضوع يعنيلك فعلا .. هتبدا تضايق واول حاجة ممكن تتبادر في ذهنك اطراف المشكلة وتبدا تلقي باللوم عليهم عشان تطلع نفسك غير مذنب بالتالي تفكك من ضميرك الي قرفك ده .. ورغم اننا في كتير من الاحيان فعلا بنلقي باللوم وبمسئولية الغلط على ناس تانية الا اننا من جوانا اوي .. عارفين انها مشكلتنا وغلطنا احنا .

مــثــلا : تبقى في رمضان صاحي من النوم الساعة 4 العصر !! الله أعلم هل لإن نومك غيبوبة ولا انك كسول ولا كان وراك شغل بتعمله فأخرت في النوم.. هتمون متضايق اوي 1- لان ده كدا مسموش صيام انك تصحى قبل الادان ب4 ساعات 2- لانك فوتت صلاة الضهر . فانت لو شخص لديك فطرة دينية سوية هتضايق وتضرب نفسك بالجزمة وهتشتمك .. وممكن كمان تدور عالي حوليك تقولهم " مصحتونيش ليه " وتخلي الغلط غلطهم انهم مصحوكش عشان تصلي .. وتبدا تنزه نفسك من الغلطة .. وده اكبر غلط واكبر من الغلطة نفسها .. !!! 

انت غلطت صلح غلطتك واستحمل مسئوليتك كاااملة ومتلقيش بيها عالناس .. توب عن انك تصحى الساعة 4 العصر ! قرر انك هتغير نظام حياتك و نظام نومتك وعدد السااعات الي بتنامها عشان تبقى صمت صح وصليت الصلاة في وقتها ..

ربنا عشان كدا خلقنا بنغلط .. عشان اولا نتوب عالغلط بالاستغفار من ربنا وبإننا نصلحه وناخد كل الاحتياطات عشان منكرروش .. القاء مسئولية غلطك وفشلك في إدارة يومك او اي حاجة تانية فشلت او غلطت فيها يخليك تكررها تاني وضميرك يبدا يبقى سترتيش بياخد ويدي مع كل أخطائك .. !

11- تفاريح .. ♥

♥ ابسطي لإنك بنت ولإن احنا كبنات ابسط حاجة ممكن تفرحنا .. مش محتاجين 200 300 جنيه زي الولاد نخرج خروجة جامدة او نشتري تيشيرت عشان - بس - يشيلوا التكشيرة من وشهم !!

♥ ابتسمي ابتسامة فيها كل المعاني للست الي غلطت غلطة عمرها وقالتلك (( يا مدام )) 

ساعتها هتعرف وش انك آنسة ;)

♥ بالنسبة لموضوع الصور الشخصية الي بيقفلنا أغلبنا .. اعرفي ان الحلوة في الحقيقة وحشة في الصور :))

بالتالي كل صورنا بتطلع وحشة وبالبلا -_-

♥ إلى عزيزتي البنوتة الجميلة المقطقطة الي لسه متجوزتش .. والي مجازا أو غباء بيسموهم عوانس ..

العيب فيهم .. مش فيكي :)

♥ افتحي اغنية لعبد الحليم أو اي مطرب بتحبيه وخليكي مقتنعة ان الاغنية دي بتتغنى عشانك انتي ..

وفي يوم من الايام في الدنيا أو الآخرة ان شاء الله هيجي واحد هيغنيها ليكي .. انتي بس :)

♥ اقتنعي انك جميلة و شعرك حلو و مناخيرك حلوة و صوتك حلو وانتي بتغني !! 

وفي الجزمة أي حد يقولك غير كدا .. :/

♥ متتوقعيش من الناس كتير .. خاصة أصحابك .. بلاش تتوقعي أي حاجة من أي حد .. 

عشان لما حد يعملك حاجة تلاقي نفسك منبهرة ومبسوطة فعلا ..

10- تيتا و جدو ^^

شخصين وجودهم في حياتك - لو انتا حابب يعني - ممكن يفرق اوي -  .. تيتا و جدو ♥♥

النهاردة اول يوم رمضان وعادتنا اننا بنفطر عند تيتا وجدو على طول اول يوم في رمضان :))

رغم الحر و الرطوبة وان بيتهم صغير لكنه حبوب اوي ولمة فطار اول يوم دي حاجة كدا من طقوس رمضان .. ^__^

تيتا وجدو هما كتابين مفتوحين عالحياة .. مليانين خبرة و معرفة وطرافات وحكايات تاريخية من أدق أحياء مصر لا يمكن تلاقيها غير عندهم هما .. لانهم مش روائيين بيقصوها لا دول عاشوها :)

وبالنسبة لشخصية الـ " تيتا و جدو " في بلاد العالم برا فالدولة بتكرمهم آخر كرم اما عندنا في مصر لا .. كفاية وقفتهم في طابور في مكتب حر جدا عشان يقبضوا المعاش .. الي هو يوم ما يبقى كبير يعني للموظفين الشيك وكدا 1000 جنيه .. دوا وعلاج ومصاريف لولادهم وللبيت :))

تيتا وجدو علاقتهم ببعض نوع من اتنين .. اما قائمة على النقار والخناقات على أتفه الحاجات ودول بيبقوا عسل :*

أو قائمة عالحب والدلع وانهم بيعيشوا حبهم وشبابهم الي معاشوهوش ايام الشباب .. ولكن في الحالتين هما على طول مع بعض وارتباطهم كبير اوي ببعض في الظروف السعيدة وغير السعيدة (( زي الي في الصورة كدا ))

وختاما .. ربنا يحفظلنا كلنا تيتا وجدو بتوعنا .. الي عاملين لينا جو وحس في الدنيا :)

9- رمضان بنكهة مختلفة

رمضان كريم أولا :))

الرسمة دي انا رسمتها امبارح .. رغم انها مش متقنة اوي وتلوينها يقرف لكن حاسة انها بتعبر عن حالة عيشنها في مصر فعلا .. فيه رمضان وفيه ثورة في نفس الوقت ..وفيه 50 قتيل كمان .. والمود العام للناس منقسم بين منفض للاحداث السياسية بالتالي مبسوط برمضان عادي وناس تانية حزينة ومكتئبة ومش حاسة رمضان .. وناس مكس بين الاتنين .. وانا من دول بقى :))

مينفعش نقول ان رمضان حزين .. رمضان مينفعش يكون حزين لانه شهر كدا بيجي ببهجته .. 

بيجيلنا مرة واحدة في السنة فهو ضيف ومينفعش نستقبله استقبال فاتر او نكون مهمومين معاه .. واجبنا تجاه ربنا في الشهر ده اننا نعبده عبادة حقّة بعيد عن الصراعات والخناقات والشتايم والالفاظ البذيئة اللاذعة في حوارات السياسة ..

أعزائي الثوار والاخوان والسلطة والجيش وكل الناس .. تعالوا نفصل نفسنا شوية ونعيش رمضان صح عشان نكمل باقي سنتنا الحلوة دي صح :) 

ده كان كلام نصي السعيد اما نصي الحزين فهو حزين لان فيه أسر كتييير هتتسحر الليلة دي وتفطر بكرا وهما ناقصين فرد .. أب أو أخت أو عم أو خال .. أو زوج :))

الفاتحة على أرواح من ماتوا ..

8- القلّابة

من وحي الصورة الي قدامي ..

ممكن اتخيل اني انا العصفور الي واقف ده .. وببص على انعكاس صورة الساقية القلابة في المية ^^

الدنيا زي القلابة دي .. شوية فوق و شوية تحت .. وممكن نطبق الصورة دي على مستويين عام و شخصي :)

على المستوى العام .. 

الثوار السنة الي فاتت كانوا بيهتفوا ضد العسكر عشان معاديين الثورة .. السنة دي بيهتفوا ليهم عشان وقفوا معانا ضد مرسي :)

الاخوان السنة الي فاتت سابونا في محمد محمود ومجلس الوزراء نتقتل ونتهان ونتحبس في الوقت الي هما كانوا بيحضروا فيه لانتخابات البرلمان ... السنة دي الاخوان اضربوا واتقتلوا من الجيش في حين ان المصريين مشغولين بالحكومة والاعلان الدستوري الجديدين بالاضافة للتحضير لرمضان :)

على المستوى الشخصي ..

انا يوم ببقى فرحانة ويوم مبسوطة .. وغالبا بدون سبب وجيه .. بتبقى من عند ربنا كدا ^^

اذا اتكلمنا على المرحلة الاعدادية بالنسبة لي مثلا .. اولى اعدادي بالنسبة لي كانت مليانة مغامرات .. تانية اعدادي كانت سنة مليانة كآبات و صدمات .. تالتة اعدادي سنة في مجملها كنت مبسوطة ( وان كنت بحس بتعب وقرف احيانا ) وكانت سنة الحصاد بالنسبة لي... 

كنت زعلانة لما سبت مدرستي في ابتدائي بعدين اتبسطت في شجرة الدر ( مدرسة اعدادي ) ودلوقتي انا زعلااااانة اني هسيب الشجرة لكن ان شاء الله واثقة اني هبسط في الثانوية الجديدة .. ^^

وختاما .. اسمعوا أغنية دوري .. حمزة نمرة  =)

7- قصص من وحي فانوس رمضان

قصة ( 1 )

فانوس رمضان مرتبط بالنسبة لي بحاجات كتير حلوة .. لكن صعب يجيلي لان بقى عندي 30 سنة

وإذا طلبته من اهلي محدش هيعبرني بحجة " انتي كبرتي عالحاجات دي "

ولو سرحت بخيالي انه اجيبه لنفسي هتصدم بالواقع ان آخر 150 جنيه في المرتب فرقعتهم في الشوبنج مع البنات من يومين

وكان معايا 20 جنيه .. يجيبولي فانوس صيني سبونج بوب او توك توك في منتهى الجمال !!

لكني مش مقتنعة ان دي فوانيس أصلا !! دي لعب اطفال عاملة نفسها فوانيس :))

المهم , نزلت المكتبة جبت شوية Materials بسيطة عشان قررت ان فانوسي هصنعه لنفسي .. :D

قلبت في النت شوية ولاقيت افكار حلوة .. وبدأت الون الكارتون الي جبته ورسمت عليه نقوش وظبطّها بالجليتر ودبستها في بعض ولصقتها بالأمير .. عملت حوالي 6 فوانيس صغيرة وحطيتهم قدامي كدا ابص عليهم وكنت مبسوووطة اوي ♥♥

وجه أول يوم في رمضان الحبيب الي بنتجمع فيه كلنا وكان كل أطفال عيلة ماما عندنا وهما 6 اطفال وانا معايا 6 فوانيس .. وهما فوانيسهم أعجز عن وصف روعتها .. من سبونج بوب لتوك توك لكرومبو لحاجات كدا مش شبه الفوانيس اساسا ولو كان الفاطميين الي دخلولنا العادة دي شافوها مكانوش يقولوا ان دي فوانيس -.-

المهم اديت لكل واحد فانوس وكانوا مبسوطين بيهم نفس انبساطي لما صنعتهم بعدين اتصورنا انا وهما وفوانيسنا صورة جماعية حلوة اوي ورفعناها على فيسبوك .. :)

جايز غيرك ميفهموش او ميستوعبوش ايه الي يفرحك , لكن انتا عارف كويس بتفرح وتبسط ازاي .. 

اعمل الي نفسك فيه وحقق لنفسك فرحتك في حدود امكانياتك .. دووس وميهمكش :))))

تمت .

قصة ( 2 )

كانت ارخم حاجة ممكن تحصلي من يوم ما اتجوزنا اننا نتخانق مع بعض او يعدي علينا يوم واحنا متخاصمين !!

وفي خناقة امبارح انا كنت مُصرّة ان هو الي غلطان . واعترافا كنت حادة اوي معاه :(

صحيت الصبح .. لاقيته نزل ومش موجود .. غريبة ده النهاردة يوم أجازته ايه الي منزله بدري اوي كدا !

المهم دخلت المطبخ باتجاهي الي التلاجة .. لاقيت حاجة خلتني ازقطط من الفرحة :O 

فانوس جميل اوي وشكله والنقوش الي عليه توحي بالعظمة كدا وانك رحت لمصر القديمة !! ولاقيت رسالة متعلقة فيه :-

" إلى ملكة هذا المطبخ و ملكة بيتي و ملكة حياتي .. رمضان كريم و أنا آسف "

شلت الفانوس من مكانه .. سندت على التلاجه ومسكته جامد قوي وانا مبسووووطة و لاقيته داخل عليا وفي ايديه حاجات

كدا شكله كان في السوبر ماركت .. من غير أي كلمة .. 

قرب مني .. وحضننا انا والفانوس .. 

في أجمد مشهد رومانسي ممكن يصوروه في فيلم .. وكل ده في المطبخ :D

حاجات صغيرة اوي .. حاجات لو أدركها الرجالة نص المشاكل الزوجية هتتحل .. الستات عندهم رومانسية وطيبة اكتر بكتير مما يتصوروا .. بس هم يتصوروا :)))

تمت .

قصة ( 3 )

كنت بتمشى ساعة العصر .. شد نظري محل حاطط ترابيزة عالشارع وعارض عليها فوانيس من بتاعت الاطفال دي ..

والي شدني نوع من الفوانيس .. كان بعلم مصر .. الحتة الاولى حمرا وطابعين نسر اصفر في النص و الحتة الي تحت سودا

كان شكله جديد ومبتكر .. خطر في بالي فكرة .. طلبت من الراجل كل الكمية الي كانت عنده من الفوانيس دي .. كانوا حوالي 

12 فانوس دفعت فيهم كل ما أملك ( حوالي 160 جنيه )

رجعت لعربيتي .. والوجهة :- مـــيــــدان التـــحرير

الي الاعتصام مستمر فيه بقاله 3 ايام والعدد بيزيد والاهالي بتقبل عالميدان في الوقت الي احنا فيه ده .. الساعة 5 العصر كدا

وصلت الميدان ..واستقبلني هوا الحرية المنعش بيضرب في وشي :)

كان فيه اطفال كتير اوي مع عائلاتهم في الميدان .. اديت كل طفل قابلني فانوس .. 

يعني اديت 11 طفل 11 فانوس :)) وفضل معايا فانوس واحد .. 

وكانت إرادة ربنا ان ملاقيش ولا طفل واحد ياخد الفانوس الآخراني .. قعدت ألف .. خلاص الميدان خلصت أطفاله يعني ! / O \

لحد ما لاقيتها .. بنت بتهتف , واقفة لوحدها .. ملامحها وشعرها المربوط لورا .. السكارف الجينز التيشيرت .. قبضتها الي بتحركها وهي بتهتف .. شكلها بيوحي بمنتهى الجدية و التاثر .. جندي في مهمة خطيرة جدا في سبيل الوطن .

قربت منها .. ومديتلها ايدي بآخر فانوس ,  استغربت اوي وممدتش ايدها تاخده وكأنها افتكرت اني حد جاي بعاكس او بستظرف مثلا.. لكني قلتلها :-

" دي اول مرة اعمل كدا مع حد معرفوش .. الفانوس ده عشانك .. كل سنة وانتي طيبة وربنا معاكي :) "

سيبك انتا .. الكلام من القلب للقلب بيوصل على طول .. لقيتها ابتسمت وخدت الفانوس مني وطلبت مني اصورها بيه ..

وصورتها بالكاميرا الي ادتهالي .. لكن قبلها صورتها بعينيا وبقلبي

(( ده موقف حصل من 4 شهور تقريبا .. افتكرته دلوقتي وانا بلبسها الدبلة في حفلة خطوبتنا ))

تمت .

6- عزيزتي البشرية .. تحية طيبة و بعد

عزيزتي البشرية , تحية طيبة و بعد / ....

أخط إليك رسالتي بقلمي قبل أن أنسى مبادئ الكتابة في أرضي الحبيبة التي قدّر الله لها أن تكون مرتع للظلمة والظالمين و منبتا للخراب .. 

أنا طفل قررت ألا يأخذوا مني - رغم القصف و الاحتلال - أبسط حقوق طفولتي .. ( البهجة )

بهجتي و أصحابي سنصنعها من أبسط الاشياء .. سنحاول أن نجد وسط الحطام ذكرى جميلة أو لعبة كنا نلعبها تطيعنا أمل يدفعنا  لنكبر لنحاول البناء ..

سنحاول أن نحيط أنفسنا بجو طبيعي من الفرح والبهجة ومشاهدة برامج التليفزيون للأطفال ..

كي نحاول أن نقنع أنفسنا أننا أطفال عاديون .. وسنكون في المستقبل أن نكون رجالا أسوياء ..

عزيزتي البشرية .. لا نطلب منك  معونة أو دمعة إشفاق .. فقط نتمني ألا تأخذوا ما تبقى لنا من مصادر بهجة بسيطة ..

كصور ملونة في تليفزيون يبعثها الله لنا كغيمات بيضاء وسط انتشار السواد ..

**إهداء لأطفال الحجارة .. في فلسطين 

           لأطفال  الشهداء .. في سوريا 

           للأطفال الرجال العاملين ساكني الحواري و الأزقة .. في مصر

5- بين سوريا و فلسطين .. سؤال يحيرني

مفتتح :- أحب أبدأ حوليتي بتحية تقدير للكاتبة المرموقة رضوى عاشور على رواية الطنطورية .. أفادتني و أمتعتني جدا جدا :))

- بخصوص فلسطين :- في رواية الطنطورية ( اسم الرواية نسبة إلى بلدة الطنطورة في فلسطين الي منها بطلة الرواية رقية ) صادق ابن رقية خلص كلية هندسة وطار على ابو ظبي اشتغل هناك وبقى رجل أعمال ناجح جدا واسس أسرته و حياته كلها في أبو ظبي لكن منساش اهله واخواته وفضل يساعدهم ويساهم في تعليم شباب فلسطيني كمان . على الجانب الآخر من نفس الرواية ( عبد ) اخو صادق كان في صغره فدائي ولما كبر فضل شايل القضية على كتافه عن طريق القانون ورفع قضايا تطالب بحق الفلسطينيين في المحاكم الدولية ...

- بخصوص سوريا :- كنت مع ماما واخواتي في رحلة شوبنج لطيفة جدا .. دخلنا محل في شارع كلية آداب محل ميك آب واكسسوريز وحاجات كدا .. كان فيه شابين واقفين في المحل ولما واحد منهم نطق اول كلمة اكتشفنا انهم سوريين رغم ان شكلهم شبهنا اوي :)) الشابين مؤدبين وبياعين شطار .. وعينيهم ملونة :P جايبين ادوات تجميل و اكسسوريز و ميك آب و برفانات من سوريا يبيعوها عندنا ! وقال ايه محبوش يجيبوا بضاعة كتير من المجل عشان خايفين من الاوضاع عندنا ( قصدهم مظاهرات 30 يونيو كدا ) .. وبيشتغلوا وكسيبة ....

السؤال الي حيرني بقى هو .. ايه الصح ؟ الصح ان الفلسطينيين والسوريين يفضلوا في بلدهم يحاربوا ويجاهدوا عشان يحرروها ولا يسافروا في اي بقعة من بقاع الارض سعيا للكسب والرزق و إقامة حياة عادية زي البني آدمين بعيدا عن الخراب والدمار والتقتيل الي في بلدهم ؟ الشابين السوريين الي شفتهم وصادق في رواية الطنطورية محدش يقدر يلومهم انهم سافروا عشان يشتغلوا ويكسبوا فلوس ويكونوا اسرة .. لكن على الجانب الآخر بلدهم بتتدمر وهما رجالة وبلادهم محتاجاهم .. 

ايه الصح ؟ ان الفلسطينيين والسوريين يهاجروا من بلادهم عشان يشتغلوا ولا يفضلوا فيها ويحرروها عشان يشتغلوا فيها بعد كدا ؟!

سؤال يحيرني .. 

4- شعبي الذي لا يُقهَر

الرئيس المنتخب الي جاي بشرعية الشعب صاحب الشرعية قدر يخلعه في 4 ايام بس .. من 30/6 لـ 3/7 بمساندة القوات المسلحة ..

مينفعش مظاهرات طلعت بالملايين شاركت فيها أسر كاملة بأطفالها وستاتها وجت من القرى والنجوع كمان مش من المدن الراقية بس والناس دي تتهزم ! او ينتصر عليهم تيار مسمي نفسه تيار اسلامي بحشد في ميدان رابعة العدوية جابوه من كل انحاء الجمهورية عشان ف الاخر يبقوا قد الي في التحرير .. لكن معارضي الرئيس كانوا في التحرير وكل المحافظات اما مؤيديه في رابعة العدوية فقط ... والكلام الي انتشر ان تلات ارباع المتظاهرين ضد الرئيس بلطجية وفلول .. وانا مختلفة مع كدا لان الي اتظاهر ضد الرئيس هو الشعب .. والشعب ايوا فيه منه ناس مؤيدة لمبارك وشفيق وطنطاوي وبيحبوا الجيش والشرطة رغم البلاوي الي عملتها .. الشعب ايوا فيه ناس مستواها المادي منخفض ومتواضع فبيتضح ده في شكلهم وطريقة كلامهم وتصرفاتهم فبيقولوا عليهم بلطجية عشان شكلهم مش نضيف بس لا هما مش بلطجية .. هما مأذوش حد .. هما ليهم حق في التظاهر والتعبير عن رأيهم ذي المواطنين الي جايين من الرحاب والمعادي والمهندسين .. فشعب مصر هو كل التوليفة دي .. كل دول على اختلاف مستواهم الثقافي والاجتماعي والمادي وعلى اختلاف مظهرهم وطرق تفكيرهم .. مرسي وجماعته بغبائهم وحدوهم .. وحدهم عشان يخرجوا يقولوا للرئيس ارحل خلاص مبقيناش طايقينك .. واذا الشعب يوما اراد الحياة .. فلابد (( بعد مشيئة ربنا سبحانه وتعالى طبعا )) أن يستجيب القدر .. واستجاب ربنا لارادة الشعب الصادقة بتسخير السيسي انه يقف جمبنا ويساعدنا نخلع الرئيس ..واتخلع الرئيس ..

كلمة للجيش : لن نسمح ابدا بتدخلكم في الحياة السياسية مجددا .. وفيه ناس منكم اجرموا في حق الشعب واسقطوا شهداء في 2012 واحنا مش ناسيين ده .. ومقدما يسقط يسقط حكم العسكر .. عشان لو فكرتوا في حاجة يعني :))

كلمة للسيسي : اتمنى حضرتك تفضل رااااااجل للآخر ومتعملش زي ما طنطاوي عمل .. لو نفذت خطتك في وقت معقول نضمنلك مكان راقي في كتب التاريه ..

كلمة للشرطة : حسابنا معاكوا مخلصش .. مش هننسى جرايم أمن الدولة والاعتقالات والتعذيب وسجن اي حد معارض لنظام مبارك .. مش هنرجع نهللكم او نحتفل بيكوا الا لما ناخد تارنا .. تار خالد سعيد وتار شهداء 25 يناير .. وأملنا في عدالة ربنا أن تأخذ مسلكا لها في أرض المحروسة ...

كلمة للتيار الاسلامي : كفانا فرقة ويلا نبني مصر سوا ونبدا على نضافة من غير تقسيم اسلامي/علماني سني/شيعي والكلام ده  احنا اخوات وهنفضل اخوات  اخوة الدم و الوطن والدين 

كلمة لتمرد : شكرا يا رجالة وبنات تمرد  .. ومؤسسيها محمد عبد العزيز و حسن شاهين و محمود بدر .. تستحقوا كل تقدير وشكر لان من غير فكرتكوا جايز مكانش كل ده يحصل ..

و أخيرا الـــــــــــــــمـــــــــــــــــجــــــــــــــــــد للــــــــــــشــــــــــهــــــــــــداء 

الشهداء الي بدمهم فهمنا يعني ايه ثورة وكرامة .. وذربنا مثلين لريسين ورا بعض انه الي هيعاملنا بقلة أدب ومهانة ويشتغلنا هنقل ادبنا عليه ونخلعه ومش هنسكتله .. وتحيا مصر .

3- قصتي مع امتحان العربي

- نقصتي في ايه يا ندى الترم ده ؟

- نقصت درجة ونص في العربي يا مستر 

- كتيييييير

كان هذا حواري المقتضب مع مدرس الرياضيات في مفتتح الترم التاني .. معروف لدى أسرتي الحبيبة ان مادة اللغة العربية هي اكتر مادة مبحبهاش ومش شاطرة .. وبعد الـ1.5 بتوع الترم الاول في الشهادة الاعدادية عايزين نعوضها بقى الترم ده يا دودو :)

حاضر هحاول .. وحاولت الحمد لله , وكان ترم غريب مثير للدهشة و الشجن في كيفية مروره ونتيجته كمان :))

قبل امتحان العربي بـ3 ايام .. بدأت اراجع المنهج ومسبتش حاجة الا وبصيت عليها لكن للأمانه خلال ال3 ايام دول كنت لسه بكلم في التليفون .. وشوفت حتة من اراب ايدل اكسترا وقعدت عالفيسبوك كمان !! xD

وفي ليلة الامتحان .. كان منظر غرفتي العام ومنظري انا كمان لا يسر أي شخص اطلاقا بعد ملحمة المراجعة لاكتر مادة صعبة بالنسبة لي .. خلصت الساعة 11 تقريبا بعد ما كنت راجعت كل الي انا عايزة اراجعه فعلا وكنت شغالة بمزاجي .. وبعد ما خلصت .. حصلتلي حالة اني مش حاسة اني رايحة امتحان بكرا .. !! قعدت اهزر مع اخواتي وآكل وكدا لحد الساعة 1 بالليل بعدين صليت ..

وهنا كانت المحطة الأهم .. دعيت وانا متيقنة في الاجابة .. دعيت وانا واثقة ان ان شاء الله ربنا هيوفقني .. وفيه ناس كدا دعتلهم بالاسم ان ربنا يوفقهم .. ونمت .. وانا في العربية مع ماما نازلة الامتحان لسه مش حاسة اني رايحة امتحن ! باردة لأقصى الحدود ايه ده .. دي مش انا !!!! ومحستش فعليا اني في امتحان الا لما استلمت الورقة .. خدت Fast look كدا وبدات احل على طول ..

والحقيقة كان امتحان حيوان وكله تكّات من الي انا مبعرفش فيها حاجة .. اختياري بين تعليل نتيجة تفصيل .. معاني معرفهاش .. يعععععععع دي كل الحاجات الي انا غبية فيها جيالي يا ربي :(

وربنا قعد يلهمني بالاجابات الي بكتبها لحد سؤال اختيار احترت ما بين تعليل ونتيجة .. لو كنت سمعت كلام دماغي الفلة كنت هحلها غلط .. انما شديت على راسي جوا اللجنة وقعدت افتكر شكل الكلام المكتوب في الكتاب لحد ما ربنا هداني انها نتيجة رغم اني مكنتش مقتنعة انها صح !! وخرجت من الامتحان مش عارفة انا حالة ايه .. حاسة اني مهببة الدنيا ومستاءة أيما استياء .. لكن الحمد لله انها طلعت نتيجة فعلا :D وعدى امتحان العربي بغبائه ..

والمعجزة الحقيقية كانت النتيجة .. وهي ان ربنا الحمد لله اداني 40/40 في الامتحان ده ! طلعلي الشهادة في العربي 78.5 / 80 يعني مفيش غير درجة ونص بتوع الترم الاول .. طبعا ده ميعنيش اي حد حوليا خالص لان كدا كدا طالع في الشهادة اني ناقصة درجة ونص في العربي .. لكن ده يعني كتير ليا انا .. ربنا وفقني توفيق كبيييييييير اوووي اوووي اووووي .. الدرجة دي انا عمري ا حلمت بيها في امتحان العربي حتى امتحانات الشهر !! xD

الحمد لله .. غرضي من التدوينة دي اني اقلكم في طريق مضمون للنجاح لكنه مش سهل : رقم واحد اعمل كل الي عليك فعلا ومتسيبش حاجة تقدر تعملها الا وتعملها واجتهد بالي تقدر عليه ... رقم اتنين ادعي ربنا بثقة وتيقن في الاجابة ومتفكرش في النتيجة , متقعدش تهري وتتكلم مع الناس عن مخاوفك وهواجسك .. جرب تسلم أمرك لربنا وتبث حزنك وخوفك ليه هو بس .. ثق فيه اوي انه مش هيضيعك لإنك اعتمدت عليه حق الاعتماد .. ♥

2- نفسها في ايه ؟؟

حد فيكوا تخيل قبل كدا بنت عندها 15 سنة ممكن يبقى نفسها في ايه ؟

ممكن اديكوا فرصة تتخيلوا .. تخيلتوا ؟ تخيلتوا خلاص ؟ اوكي , انا كمان تخيلت و هقولكم نفسي في ايه ..

- نفسي انزل اهتف في مظاهرة عشان مصر أو امشي في مسيرة مع صحابي رافعين العلم .. ويعدي الموضوع بسلاسة من غير 1000 خناقة مع ماما و بابا قبل ما انزل عشان يقتنعوا .. ده لو اقتنعوا :))

- نفسي انزل اتمشى في الشارع بشورت و تيشيرت و كاب .. و محدش يعاكسني او يتحرش بيا ..

- نفسي اتمرجح و اجري و العب و اطنطط من غير ما ضميري وعقلي يفسدوا عليا متعتي بسخافة بحجة اني خلاص كبرت و بقيت آنسة ومينفعش اعمل الحاجات دي لإن شكلي ملفت اوي قدام الناس .. :/

- نفسي اطلع رحلة سفاري !! xD

- نفسي يونيفورم مدرستي الحكومة يبقى لونه << بينك >> لإن فعلا بنات كتيرة اوي بتحبه .. مش فاهمة ايه سر تمسكهم بالرصاصي لاعدادي والكحلي لثانوي .. مع إن التكلفة واحدة يعني !

- نفسي البس فستان زي بتاع سعاد حسني او الفساتين الي كانوا بيلبسوها زمان عامة .. من غير كارينا ومن غير ليجنز تحتها والنبي :D

- نفسي العب مزيكا و اغني في الشارع مع باند جامد اوي :)

- نفسي آكل كل الي انا عيزاه ومتخنش :D

الخ الخ الخ .. من أمنيات ممكن تبدو ليكوا انها تافهة اوي او هبلة اوي او مستحيل تطلع من واحدة زيي .. لكن انا واحدة من آلاف اعتقد ليهم امنيات اكثر جنونا و هبلا و حلاوة مني بكتير :)))

وللي ممكن يتهمني بأي اتهام من اي شكل .. مين قالكوا ان امنياتي دي انا عايزة احققها دلوقتي ؟ لا اطلاقا على فكرة !

عزيزاتي البنات في سن 15 سنة اذا مش قادرين او خايفين او وازعكم الديني القوي الجميل مانعكوا من تحقيق أمنياتكوا فان شاء الله مكاننا في الجنة محجوز عند رب العالمين .. ساعتها بإذن الله نتقابل ونعمل كل الي نفسنا فيه سوا ... صباح الفل :)

1- في رباط إلى يوم القيامة

بسم الله الرحمن الرحيم فلنبدأ :)

هل يوجد أحلى من " مـــصـــر " لأجعلها موضع الحديث في أول حولياتي ؟ الإجابة في رأيي لا ...

في رباط إلى يوم القيامة .. تلك كانت جملة الرسول محمد صلى الله و عليه و سلم عن مصر و جنودها الأخيار .. 

وقد تعددت التفسيرات لتلك الجملة .. منهم من فسر ذلك الرباط على إنه رباط مع الدين الاسلامي وتمسك بمبادئه .. وتفسير يقول أنه شعب كُتب عليه المشقة و الكبد و المعاناة مما هو يبرر في نظر آخرين سبب أن الشعب المصري منذ العصر الفرعوني مستعبد و مقهور و مظلوم ومغلوب على حاله و يعاني الأمرّين من أجل رضا الحاكم و لأجل فتات خبز ..

أما عن رأيي المتواضع جدا جدا .. لماذا لا نكن في رباط ولكن رباط مع العمل ؟ رباط على العمل ؟ رباط على النجاح و الحرية و التقدم و الحياة الكريمة ؟ لماذا لا نقرر كشعب اننا سنستمر في العمل الشاق ولكن لهدف أسمى هو خدمة وطننا ؟ 

أتمنى أن تكون الموجة الثورية التي افتتحت من جديد في 30 يونيو هي بداية فصل جديد من الرباط .. الرباط على حب الوطن و العمل في سبيله و ليس أي شئ آخر ..